Asmir Jahoski, i cili deri para një muaji ishte në paraburgim në burgun e Shutkës, sot është shfaqur në disa fotografi nga Bosfori, pra nga Turqia. Pas heqjes së paraburgimit, atij iu konfiskua pasaporta, ndërsa dha miliona si garanci se nuk do të arratisej. “Skopje1” mëson se më pas ai ka kërkuar që përkohësisht t’i kthehet pasaporta, dhe kështu, largimi i tij në Stamboll është ligjor, pasi gjyqtarët e kanë miratuar këtë.
Ndoshta nuk do të ishte marrë vesh fare që biznesmeni, pronari i “Pucko Petrol” dhe i dyshuar për abuzime, ndodhet në Turqi – po të mos ishin fotografitë e publikuara nga Alija Jahoski, i cili uroi për “përfundimin e shkollimit” të një anëtari të familjes. Në dy prej fotove shfaqet edhe i dyshuari Asmir Jahoski. Në njërën prej tyre është bashkë me xhaxhain, babanë dhe të diplomuarin, ndërsa në tjetrën, me babanë dhe të diplomuarin.
Mbetet e panjohur se kur i është lëshuar pasaporta e përkohshme Jahoskit, duke pasur parasysh që më 6 maj atij iu konfiskua dokumenti i udhëtimit, pasi gjykata i caktoi masë për sigurimin e pranisë së tij. Nga gjykata do të kërkojmë shtesë informacion për të ditur se kur Jahoski duhet të kthehet në Maqedoni.
Në vendimin e Gjykatës së Apelit thuhet gjithashtu se ai duhet të paraqitet çdo të hënë të parë të muajit në Gjykatën Penale, që do të thotë se këtë duhet ta bëjë nesër.
Jahoski është i dyshuar në hetimin për furnizimin me mazut për TEC Negotinë. Për mënyrën se si doli nga paraburgimi, kemi shkruar muajin e kaluar.