Kryetari i Kërçovës, njëherit edhe anëtar i kryesisë së lartë të BDI-së, Fatmir Dehari, duke folur për zgjedhjet nëpër Këshillat e BDI-së dhe kryetarët e degëve, ishte kritik për demokracinë e brendshme partiake, duke thënë se nuk i duket e udhës që të rinjtë të vrapojnë pas anëtarësimeve, madje edhe të pleqve, vetëm për të siguruar vota.
“Në këtë proces do të dëshiroja mbi të gjitha të sundojë dhe dominojë njerzillëku, respekti i ndërsjellë të bëhet një zgjedhje në fund të fundit e qetë, le ta quajmë demokraci, mundet për Artanin të jetë demokraci shumë e madhe por unë thash qasjen time kam të drejtë të jap dilemat e mija, ky le të jetë një mesazh reflektimi për të gjithë”.
Duke folur për zënkat brenda BDI-së, e sidomos ato që çuan deri në fraksionizmin e partisë në të ashtuquajturin “grupi i zjarrit”, Dehari tha se nuk mendon se ato janë vetëpërjasjtuar, sepse sipas tij, lëshimi i një mbledhjeje të partisë nuk nënkupton vetëpërjashtim. Gjatë gjithë kohës bëri thirrje për pajtim e reflektim, ndërsa u shpreh se rikthimi i grupit të zjarrit do të ishte në të mirë të të gjithëve.
“-Po më thoni që kthehet grupi i zjarrit në BDI?
-Pse të mos kthehen, unë gjithë kohës them që të kthehen, unë e thash dhe e them që të kthehet, sigurisht të kthehet. A do të kthehet është diçka tjetër por për të mirën tonë të përbashkët dhe për të mirën e qytetarëve unë them që të kthehet”.
Sa i takon bashkë partiakut të tij Ramiz Merko, i cili u shpall persona non grata nga SHBA-të por që ende vazhdon të mbajë funksionin si Kryetar i Strugës, Dehari tha se për arsye morale Merko do të duhej të jepte dorëheqje./tv21