Deputeti Blerim Bexheti ka reaguar përmes një postimi në Facebook lidhur me protestën studentore të mbajtur sot, ku në fokus ishte kërkesa për mbajtjen e provimit të jurisprudencës në gjuhën shqipe.
Në reagimin e tij, Bexheti thekson se studentët po kërkojnë një të drejtë legjitime që buron nga ligji për përdorimin e gjuhëve. Sipas tij, nuk bëhet fjalë për privilegje, por për zbatim të plotë të ligjit dhe respektim të parimit të barazisë.
Ai nënvizon se është e papranueshme që, edhe pas miratimit të ligjit, studentëve ende nuk u mundësohet që të studiojnë dhe të vlerësohen në gjuhën e tyre amtare. Bexheti kërkon nga institucionet përgjegjëse që të reagojnë pa vonesa dhe të garantojnë kushte të barabarta për të gjithë.
Protesta e studentëve u zhvillua në mënyrë paqësore, ndërsa u shoqërua me pankarta dhe thirrje që kërkojnë zbatimin praktik të të drejtave gjuhësore. Studentët paralajmëruan se do të vazhdojnë me reagime nëse kërkesat e tyre nuk adresohen.